Sex starfsmenn áminntir vegna uppflettinga í sjúkraskrá

Sex starfsmenn Landspítala hafa fengið áminningu vegna uppflettinga í rafrænni sjúkraskrá. Við reglubundna athugun á sjúkraskrá Landspítala gerði eftirlitsnefnd með sjúkraskránni athugasemd við uppflettingu níu starfsmanna við reglubundna athugun á notkun sjúkraskrárinnar. Í þremur tilfellum reyndist um eðlilegan aðgang að ræða en sex starfsmenn fengu áminningu.

Eftirlitsnefnd með rafrænni sjúkraskrá hefur það hlutverk að gera reglubundnar athuganir á því hvort starfsmenn sem opna sjúkraskrár eigi þangað eðlilegt erindi, framkvæma úttektir á sjúkraskrám, sem valdar eru af handahófi, sinna upplýsingaöflun um aðgengi að einstökum sjúkraskrám, skv. ábendingum framkvæmdastjóra lækninga og hafa frumkvæði að því að skoða opnanir sjúkraskráa valdra einstaklinga.  Farið var yfir slembiúrtak 50 lækna og 100 hjúkrunarfræðinga.