Jósef búinn að skrifa undir þriggja ára samning

Jósef Kristinn Jósefsson skrifaði í dag undir þriggja ára samning við búlgarska liðið PSFC Chernomorets Burgas en hann var á reynslu hjá liðinu í síðasta mánuði. Þetat kemur fram á heimasíðu Grindavíkur.

Grindavík selur Jósef til búlgarska liðsins en upphæðin er sögð vera trúnaðarmál í fréttinni á Grindavíkursíðunni. Keppni í búlgörsku deildinni hefst aftur á morgun eftir vetrarfrí en félagaskiptaglugginn þar í landi lokar á sunnudaginn.

„Við fögnum því að Grindvíkingur í húð og hár sem alinn er upp hér í félaginu fái þetta tækifæri. Jósef er vel að því kominn, hann hefur lagt mikið á sig við æfingar og í leikjum og hefur alla burði til þess að ná langt í boltanum,“ sagði Þorsteinn Gunnarsson, formaður knattspyrnudeildar við heimasíðu Grindavíkur.