Forráðamenn Víkings þekkja ekki feril Bjarnólfs

Forráðamenn Víkings voru augljóslega ekki að vanda sig mikið þegar þeir sendu út fréttatilkynningu í dag um nýjan þjálfara félagsins, Bjarnólf Lárusson.

Í fréttatilkynningunni stendur að Bjarnólfur hafi orðið Íslandsmeistari með ÍBV tvisvar sinnum og að hann hafi einnig orðið einu sinni bikarmeistari með Eyjamönnum.

Það er einfaldlega rangt. Hið sanna er að Bjarnólfur varð aðeins einu sinni Íslandmeistari með ÍBV og hann vann aldrei bikarmeistaratitil með félaginu.

Titilinn vann hann 1997. Ári síðar vann ÍBV tvöfalt en þá var Bjarnólfur farinn í atvinnumennsku.