Heimir: Hefðum átt að skora allavega fjögur

Heimir Hallgrímsson, hinn geðþekki tannlæknir og þjálfari ÍBV, brosti þrátt fyrir allt eftir 2-1 tap í kvöld. Ef til vill fannst honum grátbroslegt að nýta ekki eitthvað af dauðafærunum sem liðið hans fékk í tapinu gegn Þór.

"Við fengum færi til að vinna þennan leik, svo sannarlega. Við áttum að skora fjögur eða fimm mörk, í það minnsta. Þetta datt einfaldlega ekki með okkur," sagði Heimir.

"Við stjórnuðum leikum í seinni hálfleiknum en okkur tókst ekki að skora."

Þriðji markmaður ÍBV, Guðjón Sigurjónsson, var í markinu í fjarveru Albert Sævarssonar og Abels Dhaira. Hann hefði ef til vill átt að gera betur í báðum mörkunum.

"Ég á eftir að sjá þetta aftur, kannski gat hann gert betur í seinna markinu þar sem hann fékk á sig mark á nærstönginni. En þetta fer í reynslubankann hjá honum," sagði Heimir.