Hannes Þór: Atli með nákvæma uppskrift að vítinu

Hannes Þór Halldórsson hetja KR-inga var heldur betur sáttur við sigurinn á FH.

„Þetta var frábært kvöld. Ég held þau gerist ekki mikið sætari fyrir markmann kvöldin í Frostaskjólinu. Hafa hangið á þessu í erfiðum fyrri hálfleik og svo náum við að snúa þessu við eftir vítið. Að landa svo sigri, halda hreinu og fara í frí á toppnum. Þetta gerist ekki sætara.“

Hannes náði sér ekki almennilega á strik undanfarin tvö tímabil með Fram en hefur spilað frábærlega með KR í sumar.

„Já, ég er í fínu standi. Ég er búinn að æfa vel og vera laus við meiðsli. Svo nýt ég mín mjög vel í Vesturbænum. Svo maður sé rómantískur þá finnur maður sömu pizzulyktina og maður fann þegar maður var lítill og mætti á völlinn. Það er gaman og góður mórall í liðinu. Góð stemmning og ekkert til fyrirstöðu að standa sig sæmilega.“

Hannes var búinn að kortleggja vítaspyrnu Matthíasar.

„Já, ég var eiginlega með hjálp Atla Jónasar og Gumma Hreiðars búinn að því. Atli var með nákvæma uppskrift að því hvað myndi gerast ef ég stæði nógu lengi. Verð að gefa Atla credit fyrir það.“