Jón Guðni: Var sanngjarnt

„Við tökum stigið sáttir en þau hefða getað og mátt vera þrjú í dag. Þeir fá kannski færi líka til að klára þetta þannig að ég held að þetta hafi verið sanngjarnt,“ sagði varnarmaðurinn öflugi Jón Guðni Fjóluson eftir að Fram og Breiðblik gerðu 1-1 jafntefli á Kópavogsvelli í kvöld.

„Við náum að spila þétt í dag og þegar það gengur illa þarf að byrja frá aftasta manni og byrja upp á nýtt í sjálfu sér og við gerðum það ágætlega í dag.“

Fram brotnaði ekki við að lenda snemma undir eins og hætt er við þegar illa hefur gengið. „Þar sem ekkert hefur gengið það sem af er sumars gerist það ósjálfrátt að menn falla til baka en okkur tókst að ráða ágætlega við það. Við unnum ágætlega úr því.“

„Leikurinn opnaðist eftir að við skoruðum og við náðum ágætum spil köflum  og spiluðum okkur upp völlinn og fáum fín færi sem hefur vantað hjá okkur en við náðum því miður ekki að klára nema eitt í dag.“

Arnar Gunnlaugsson heldur áfram að skora fyrir Fram og hefur sem fyrr skorað öll mörk liðsins á tímabilinu en Arnar hefði hæglega getað skorað meira í leiknum. „Hann hefði getað gert það en það er ekki alltaf hægt að treysta á hann. Hann fékk góð færi í kvöld og hefði að öllu jöfnu klárað þessi færi en það datt ekki fyrir hann í dag.“

Jón Guðni gat ekki svarað því með vissu hvort þetta hefði verið kveðjuleikur hans með Fram eða hvort hann leiki með liðinu eftir EM U-21 árs landsliða áður en hann heldur til Belgíu. „ Ég veit það ekki endanlega, það er eitthvað sem liðin ráða og ég geri bara eins og mér er sagt,“ sagði Jón Guðni.