Guðjón: Þetta er svakalegur léttir

Guðjón Baldvinsson er búinn að ganga frá nýjum þriggja ára samningi við KR og mun spilar með Vesturbæjarliðinu í Pepsi-deildinni í sumar. Guðjón fékk sig lausan frá sænska liðinu GAIS sem hafði lánað hann til KR síðasta sumar.

„Þetta er svakalegur léttir enda búið að vera óvissuástand í langan tíma. Það er mjög góð tilfinning að þetta sé búið," sagði Guðjón í samtali við Vísi í kvöld.

„Það var ljóst að ég væri ekki fara aftur út. Það gekk vel á síðasta tímabili en samt komu engin viðbrögð frá þeim. Maður fann strax að maður var ekki að fara þangað aftur á meðan þessi þjálfari var þar. Það fannst lausn á því sem ég er mjög sáttur við. Ég var ekki spenntur fyrir því að fara aftur á láni. Ég er með fjölskyldu og vill fá smá festu í þetta núna," segir Guðjón sem skoraði 10 mörk í 13 leikjum með KR í Pepsi-deildinni á síðasta tímabili.

„Ég var ánægður með síðasta sumar fyrir utan meiðslin. Það er búið að vera hrjá mig síðustu tímabil að ég hef bara náð örlitlu af tímabilinu. Nú er stefnan sett á það að halda sér heilum og reyna að gera eitthvað af viti," segir Guðjón sem ætlar að setja drauminn um atvinnumennsku upp á hillu í bili.

„Ég er farinn að einbeita mér að öðru núna en að komast út í atvinnumennsku. Ég er með fjölskyldu og okkur líður vel í KR. Núna ætla ég bara að halda áfram í skólanum og taka upp þráðinn þar sem frá var horfið.Ef eitthvað kemur upp þá skoða ég það en það þarf að vera eitthvað betra en það sem maður var í síðast til þess að maður hendi sér í það aftur," sagði Guðjón.

„Ég er ekkert að fara á taugum þótt að ekkert gerist. Ég ætla að bara að einbeita mér að því að standa mig hjá KR og reyna að vinna einhverjar dollur. Svo kemur bara tilboðið þegar það kemur. Við höfum verið að ná vel saman á undirbúningstímabilinu og loksins er komin smá reynsla á liðið. Við erum búnir að spila flestir saman í smá tíma og þetta er ekki nýtt lið eins og hefur verið síðustu ár. Ég bind góðar vonir við það að það eigi eftir að reynast okkur vel," sagði Guðjón sem er bjartsýnn og spenntur fyrir sumrinu með KR.