Páll: Hjálpar allt í stigasöfnuninni

Páll Viðar Gíslason leit á jákvæðu hliðarnar á steindauðu jafntefli við Grindavík í kvöld. Hann sér batamerki á liðinu eftir þrjú töp í röð.

"Þetta var 0-0 og þar með kannski steindautt en baráttan og viljinn var til fyrirmyndar. Okkur tókst ekki að skora en við lögðum allt sem við áttum í leikinn," sagði Páll sem horfir á það jákvæða.

"Við fengum ekki á okkur mark, það hefur ekki gerst oft í sumar hjá okkur. Við fengum eitt stig en vildum þrjú en þetta hjálpar í stigasöfnuninni. Það er sama barátta áfram, Fram á leik til góða en ég vildi frekar vera sjö stigum frá þeim en sex eftir kvöldið."

"Við sköpuðum fá færi en fengum fullt af upphlaupum til að fá færin. Við tvöfölduðum vel á bakverðina og svona 15-20 fyrirgjafir enduðu hjá þeim en ekki á okkar mönnum, þá er erfitt að skora," sagði Páll sem sér batamerki á liðinu eftir þrjá tapleiki á undan þessum.

"Við börðumst allavega fyrir stiginu og það hlýtur að teljast batamerki að halda markinu hreinu," sagði þjálfarinn.