„Ég ætla ekki lengur að bera þessa skömm, því hún er ekki mín", segir ein þeirra kvenna sem sakar Gunnar Þorsteinsson í Krossinum um að hafa brotið gegn sér kynferðislega. Hún segir að brotin hafi byrjað þegar hún var 14 ára og að þau hafi staðið yfir í meira en tíu ár.
Sólveig Guðnadóttir er fyrrverandi mágkona Gunnars í Krossinum en systir hennar var eiginkona Gunnars í mörg ár. Hún er ein sex kvenna sem nú hafa stigið fram með ásakanir um að Gunnar hafi áreitt þær kynferðislega en Gunnar neitar þessum ásökunum staðfastlega.
Sólveig segir að í meira en tíu ár hafi hún þurft að þola kynferðislegt káf Gunnars í Krossinum, sem hún segir að hafi lengi verið eins konar föðurímynd í hennar lífi. Hún man vel eftir fyrsta skiptinu en þá var Sólveig aðeins 14 ára.
„Við lágum saman upp í sófa og þetta er síðladags, rökkur úti og við sjálfsagt þreytt og ég hálfsofna. Þá fer hann að káfa á brjóstunum á mér. Mér þótti þetta svo hræðilega óþægilegt að ég ákvað að færa mig niður á gólfið og leggjast á grúfu en hann teygði hendina niður og hélt áfram. Ég þorði ekki að hreyfa mig og segja neitt og þóttist vera sofandi," segir Sólveig.
Hún segir að uppfrá þessi hafi Gunnar nýtt hvert tækifæri sem gafst til þess að leita á hana. Þetta hafi verið stöðug kynferðisleg áreitni og sífellt káf.
Sólveig sleit sig frá Gunnari og Krossinum fyrir einum tíu árum. Lengi vel hélt hún að hún væri sú eina sem hefði upplifað þessi áreitni en þegar hún komst að því að systir hennar og fleiri konur höfðu sömu sögu að segja ákvað hún að stíga fram.
„Ég er hætt og ég ætla ekki lengur að bera þessa skömm því hún er ekki mín. Ég bjó ekki til þetta vandmál. Gunnar gerði það sjálfur. Mig langar í lækningu fyrir mig, fyrir allar þessar konur, fyrir Gunnar, fyrir börnin hans og fyrir kirkjuna. Ég er trúuð manneskja og ég trúi því að sannleikurinn geri menn frjálsa," segir Sólveig.
Þurfti að þola kynferðislegt káf Gunnars í Krossinum
Tengdar fréttir
„Ég er niðurbrotinn maður“
Gunnar Þorsteinsson í Krossinum segist niðurbrotinn vegna ásakanna um að hann hafi brotið gegn fimm konum. Á meðal þeirra sem saka Gunnar um kynferðislega áreitni er tvær fyrrverandi mágkonur hans
Ásakanirnar ekki frá nýju trúfélagi
„Ég kannast ekki við það, ég er ekki í því trúfélagi,“ segir Ásta Knútsdóttir, talskona kvennanna sem ásaka Gunnar Þorsteinsson um að hafa brotið á sér.
Sonur Gunnars: „Pabbi, ég stend með þér alla leið“
Sonur Gunnars Þorsteinssonar, forstöðumanns Krossins, lýsir yfir fullum stuðningi við föður sinn vegna þeirra ásakana sem fram hafa komið um að hann hafi áreitt fjölda kvenna kynferðislega. Sonurinn, Guðni Gunnarsson, hefur sett inn á Facebook-síðu sína tengil á lagið „Vertu hjá mér" með kristilegu hljómsveitinni GIG, sem hann er sjálfur meðlimur í. Með tenglinum fylgja skilaboð til föður hans: „Textinn er fyrir dag eins og í dag... pabbi ég stend með þér alla leið.."
Gunnar í Krossinum: Herferðin er frá hópi í nýju trúfélagi
Gunnar Þorsteinsson í Krossinum birtir yfirlýsingu á heimasíðu Krossins nú í kvöld. Þar segir hann að hann sé bugaður maður og ásakanir um að hann hafi brotið gegn fimm konum séu tilhæfulausar. Hann segir einnig að eftir að hann og Jónina giftu sig hafi þau fengið hótanir.
Fimm konur saka Gunnar í Krossinum um kynferðisbrot
Fimm konur hafa stigið fram og sakað Gunnar Þorsteinsson, forstöðumann trúfélagsins Krossins, um að hafa brotið á þeim kynferðislega. Brotin eru samkvæmt lýsingum kvennanna fyrnd að lögum sökum þess hversu langt er liðið frá því að þau áttu sér stað.
Leitar leiða til að hreinsa mannorð sitt
„Ég er bugaður maður, þetta er mér afar þungbært, og það er mikil sorg í hjarta mínu,“ segir Gunnar Þorsteinsson, forstöðumaður Krossins. „Ég verð að leita allra úrræða til að hreinsa mannorð mitt, og það mun ég gera.“
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
