Oddviti Framsóknar lánaði sjálfum sér auglýsingaskilti

„Sem vallarstjóri tekur hann og notar eigur bæjarins í sína prívat þágu," segir Lára Jóna Þorsteinsdóttir, kosningastjóri VG í Kópavogi, sem er allt annað enn sátt við Ómar Stefánsson, oddvita framsóknarmanna í Kópavogi. Hún segir að Ómar hafi tekið svokallaða búkka sem eru í eigu Kópavogsvallar og komið fyrir víðsvegar um bæinn með auglýsingum frá Framsóknarflokknum. Lára Jóna bendir á öðrum framboðum hafi ekki staðið slíkt til boða. Þetta hafi auk þess verið gert í trássi við ákvörðun byggingarfulltrúa bæjarfélagsins.

Auk þess að sitja í bæjarstjórn starfar Ómar hjá Kópavogsbæ sem vallarstjóri á Kópavogsvelli. „Ómar tók búkka sem völlurinn á, setti auglýsingaskilti Framsóknarflokksins á þá og plantaði þeim víðsvegar um bæinn. Hann notaði væntanlega vallarstarfsmenn til að koma þeim fyrir," segir Lára Jóna.

Þá segir Lára Jóna að málið hafi verið tekið upp á fundi bæjarráðs í vikunni. Á fundinum hafi fulltrúar Sjálfstæðisflokksins aftur á móti ekki treyst sér til að taka afstöðu til þess hvort að fjarlægja ætti skiltin. „Það er ekki sæmandi að hann misnoti aðstöðu sína svona."