VG í Kópavogi, verkkvíðinn flokkur

Arnþór Sigurðsson formaður frjálsíþróttadeildar Breiðabliks og fulltrú Vg í íþrótta og tómstundaráði Kópavogs (sem er ráðgefandi varðandi fjárframlag til Breiðabliks og því situr Arnþór beggja vegna borðsins) fer mikinn í fréttablaðinu fyrr í þessum mánuði. Þar kveinkar hann sér mjög undan því að það þurfi í Kópavogi eins og öðrum sveitarfélögum að taka til hendinni við gerð fjárhagsáætlunar í ljósi efnahagsástandsins. Mikil fólksfjölgun í Kópavogi á undaförnum árum virðist vera helsti sökudólgurinn að hans mati. Þetta er rangt mat því ljóst er að fjölgunin hefur lagt grunninn að því að hægt hefur verið að byggja upp með svo kröftugum hætti sem raun ber vitni og að einmitt þess vegna verður auðveldara að vinna bæjarfélagið út úr efiðri fjárhagsstöðu.

Síðasti meirihluti skilar góðu búi með mörg sóknarfæri. Kópavogsbær er vel í stakk búinn til þess að taka við nýju fólki og frekari uppbyggingu án þess að ráðast þurfi í framkvæmdir nema að mjög takmörkuðu leyti. Það var alltaf markmið síðasta meirihluta að byggja upp hverfin jafn óðum og íbúarnir flyttu inn í þau og efla alla þjónustu við bæjarbúa. Það er þess vegna sem íþróttahús, knatthús, sundlaugar, skólar, leiksskólar og menningarhús standa þegar byggð og þjóna íbúum bæjarins.

Skuldir bæjarins, sem að mestu hafa tekið hækunum vegna lóðarskila, munu síðan lækka hratt þegar efnahagslífið kemst kemst í gang á ný. Það mun þó dragast á langinn ef menn ætla endalaust að stíga dansinn við drauga fortíðar og velta sér upp úr sjálfsvorkun og vænisýki. Nú þegar er farið að birta til þar sem aðilar hafa óskað eftir viðræðum um kaup á Gustssvæðinu, hafin er nýbygging fjölbýlishúss í Þorrasölum, sennilega sú fyrsta eftir hrun og verktakar eru farnir að huga að uppbyggingu á Kópavogstúni.

Meirihutinn í Kópavogi óskaði eftir samvinnu við minnihlutann í Kópavogi og hélt ég að það væri í kjölfar þess að slík vinna hafði átt sér stað tvö síðustu ár. Það var ekki fyrr en ég las fyrrgreinda grein Arnþórs að ég áttaði mig á því að Vg treysti sér ekki í verkið þrátt fyrri að hafa boðið sig fram til þess í síðustu kosningum. Aðkoma minnihlutans hefur orðið til þess að bæta mjög niðurstöðu fjárhagsáætlunarinnar. Það er trú mín að við sem sitjum í bæjarstjórn eigum að leggja áherslu á að skila sem bestri vinnu fyrir íbúa í Kópavogsbæ. Það var á þeim forsendum sem fulltrúar minnihlutans tóku þátt í fjárhagsáætluninni og það er með ánægju sem við drögum úr verkkvíða Arnþórs Sigurðssonar og félaga léttum þeim verkið með góðum tillögum af okkar hálfu.