Segir ríkisstjórn fæla erlenda fjárfesta frá með seinagangi

Seinagangur um nauðsynlegar breytingar á reglugerðum um VSK og óskýr svör ráðamanna vegna uppbyggingu gagnavera hefur dregið mjög úr trúverðugleika Íslands að mati formanns samtaka íslenskra fyrirtækja í gagnaversiðnaði. Hann telur einnig hugsanlegt að aðgerðaleysið hafi fælt erlenda viðskiptavini frá landinu .

Meðal aðildarfélaga í samtökunum eru Thor Data Centers, Nýherja samstæðan, Verne Global, Síminn, Titan Global, Greenstone, Glacier Guards, Nordata og fleiri fyrirtæki.

„Fjármálaráðuneytið hefur áður lýst sig reiðubúið til að tryggja að samkeppnisumhverfi íslenskra gagnavera sé sambærilegt því sem gerist í Evrópu. Hins vegar hefur seinagangur við að gera nauðsynlegar breytingar reglugerðum um VSK dregið mjög úr trúverðugleika landsins gagnvart erlendum viðskiptavinum," segir Friðrik Þ. Snorrason formaður samtakanna.

Í tilkynningu frá samtökunum segir að vegna umræðu um álagningu á innfluttum búnaði fyrir gagnaver er rétt að vekja athygli á því að VSK á innfluttum búnaði gagnavera skapar í raun litlar hindranir.

Álagningin býr til innskatt sem gagnaverin fá að fullu endurgreiddan frá ríkinu. Hindranir yfirvalda felast í því að VSK skal greiddur þótt þjónusta gagnavera sé seld úr landi og kvöð á viðskiptavini gagnaveranna að stofna til fastrar starfsstöðvar hér á landi.

„Það er í raun mikið hagsmunamál fyrir Ísland að gagnaver rísi hér á landi. Viðskiptaáætlanir Farice um rekstur sæstrengjanna til Bretlands og Danmerkur byggja á því að miðlun gagna til og frá landinu stóraukist með tilkomu gagnavera. Á Farice hvílir tugmilljarða króna lán sem ekki verður hægt að standa undir miðað við núverandi notkun á sæstrengjunum.

Íslenska ríkið er að stóru leyti í ábyrgðum fyrir þessum lánum. Því er hætt við að ábyrgðinni verði ýtt yfir á íslenska skattgreiðendur ef hindrunum fyrir byggingu gagnavera verði ekki rutt úr vegi," segir Friðrik að lokum.