Segir Evu Joly hafa spillt Exeter-málinu

Lögmaður fyrrverandi forstjóra MP banka segir Evu Joly hafa mælt fyrir um óhefðbundnar rannsóknaraðgerðir í svokölluðu Exeter-máli og þær hafi í ýmsum tilvikum leitt til ólögmætra aðgerða við rannsóknina. Vísa beri málinu frá vegna þess að sérstakur saksóknari hafi ekki haft lögbundið sjálfstæði í störfum sínum. Hann hefur sent ráðherrum bréf vegna málsins.

Þetta kemur fram í greinargerð sem Ragnar H. Hall, lögmaður Styrmis Þórs Bragasonar, hefur lagt fram í málinu og Fréttablaðið hefur undir höndum. Exeter-málið svokallaða er hið eina sem sérstakur saksóknari hefur gefið út ákæru í. Það snýst um ríflega eins milljarðs lánveitingar Byrs til félagsins Exeter Holdings fyrir kaupum á stofnfjárbréfum í sparisjóðnum, af MP banka og stjórnarmönnum í sjóðnum. Auk Styrmis eru Jón Þorsteinn Jónsson, fyrrverandi stjórnarformaður Byrs, og Ragnar Z. Guðjónsson, fyrrverandi sparisjóðsstjóri, ákærðir í málinu. Allir sakborningar hafa neitað sök og krafist þess að málinu verði vísað frá.

Ragnar er gagnrýninn á störf Joly og segir hana hafa fengið víðtækara verksvið en almennt sé gert ráð fyrir í lögum um ráðgjafa sérstaks saksóknara. „Hér var gengið svo langt í þeim efnum, að „ráðgjafinn“ virðist hafa fengið einhvers konar allsherjarvald yfir embætti sérstaks saksóknara og gat gefið honum og ríkisstjórn landsins nánast bindandi fyrirmæli um hvað eina sem hún teldi þjóna rannsóknarhagsmunum í hinum ýmsu málum,“ segir Ragnar.

Gögn sýni að „yfirsaksóknarinn“, eins og Ragnar kallar Joly, hafi mælt fyrir um „óhefðbundnar rannsóknaraðgerðir“ sem hafi leitt til ólögmætra aðgerða. Hann hefur ritað forsætis-, dómsmála- og fjármálaráðherra bréf um málið þar sem hann krefst meðal annars afrita af öllum samningum sem gerðir hafi verið við Joly um samvinnu við íslensk yfirvöld. Þegar greinargerðin var lögð fram á fimmtudag í síðustu viku höfðu svör borist frá forsætis- og dómsmálaráðuneytunum.

stigur@frettabladid.is