Arnór gerði gæfumuninn er FCK varð bikarmeistari

Innkoma Arnórs Atlasonar í lið FCK gegn Bjerringbro/Silkeborg í úrslitum dönsku bikarkeppninnar gerði gæfumuninn og FCK byrjaði árið á því að hampa einum bikar.

Arnór hefur ekki alveg verið heill heilsu en gat byrjað leikinn í dag og skoraði þrjú af fyrstu fjórum mörkum liðsins.

Hann skoraði einnig sigurmark leiksins en FCK vann með einu marki, 30-31.

Arnór skoraði í heildina sjö mörk í leiknum og virðist vera á hárréttri leið fyrir EM sem eru frábær tíðindi fyrir íslenska landsliðið.