Ráðherrar ánægðir með nýja samninginn

Þau Jóhanna Sigurðardóttir forsætisráðherra og Steingrímur J. Sigfússon fjármálaráðherra lýstu bæði yfir mikilli ánægju með nýjan Icesave-samning að loknum ríkisstjórnarfundi nú fyrir hádegið.

Ráðherrarnir voru spurðir um ábyrgð núverandi ríkisstjórnar á Svavarssamningnum svokallaða og svaraði Steingrímur því til að aðstæður á þeim tíma hafi verið allt aðrar en nú eru uppi. Hann benti meðal annars á að Íslendingar hafi á þeim tíma ekki verið í skjóli þess að hafa fengið endurskoðun hjá Alþjóðagjaldeyrissjóðnum og sagði Steingrímur að samningurinn sem þá var gerður hafi verið sá besti sem í boði var á þeim tíma.

Steingrímur sagðist ennfremur telja að ekki þurfi að koma til endurskoðunar fjárlaga vegna samningsins og að skattar verði ekki hækkaðir, útgjöldum ríkisins verði mætt með öðrum hætti.