Engin ríkisaðstoð - ákvörðunin var viðskiptalegs eðlis

Fjármálaráðuneytið segir í tilkynningu að engin fyrirmæli um kaup á eignunum úr sjóðunum voru gefin út af stjórnvöldum hér á landi. Ráðuneytið lítur svo á að ákvörðunin hafi verið viðskiptalegs eðlis.

ESA, eftirlitsstofnun EFTA, hefur ákveðið að hefja formlega rannsókn á því hvort kaup nýju bankanna þriggja á eignum peningamarkaðssjóða við slit þeirra sjóða í október 2008 hafi falið í sér ríkisaðstoð í skilningi 61. gr. EES-samningsins. ESA segir að viðskiptin hafi numið allt að því 70 milljörðum íslenskra króna.

Felst sú afstaða stofnunarinnar að hugsanlega hafi falist ríkisaðstoð til handa rekstrarfélögum peningamarkaðssjóðanna, í ákvörðunum nýju bankanna.

Í tilkynningu sem finna má á vef fjármálaráðuneytisins segir að íslensk stjórnvöld hafi komið á framfæri við ESA rökstuddum andmælum við þeim fullyrðingum sem fram koma í kvörtun til ESA, að stjórnvöld hafi ekki komið að ákvarðanatöku eða fjármögnun kaupa bankanna.

Samkvæmt upplýsingum sem borist hafa frá hverjum banka voru ákvarðanir um kaup á eignum úr sjóðunum teknar á viðskiptalegum forsendum samkvæmt tilkynningu ráðuneytisins.

Ennfremur segir í tilkynningunni að sjóðsfélagar hafi verið að miklum meirihluta viðskiptavinir bankanna og bankarnir töldu brýnt við þær aðstæður sem ríktu í október 2008 að eyða óvissu sem upp var um endurheimtur úr peningamarkaðssjóðum.

Ætla má að niðurstaða hinnar formlegu rannsóknar ESA liggi fyrir á næsta ári.

Endanleg ákvörðun ESA um hvort ríkisaðstoð hafi falist í umræddum ákvörðunum og hvort slík ríkisaðstoð teljist ólögmæt, yrði síðan kæranleg til EFTA-dómstólsins.

Ekki náðist í Steingrím J. Sigfússon, fjármálaráðherra vegna málsins.