Greiðslukortin straujuð til kaupa á raftækjum

Samdráttur var í öllum tegundum verslunar í ágúst, að raftækjum undanskildum en sala raftækja virðist nú vera að taka við sér á nýjan leik eftir gríðarlegan samdrátt. Aukin kortavelta bendir til að hún hafi eingöngu náð til kaupa á raftækjum.

Fjallað er um málið í Morgunkorni greiningar Íslandsbankla. Þar segir að þannig jókst velta með raftæki um 10,7% í september borið sama við sama tímabil fyrra árs að raunvirði og er þetta fjórði mánuðurinn í röð sem veltan í raftækjaverslunum hefur aukist á þennan mælikvarða.

„Ef einkaneyslan er raunverulega að aukast eins og kortaveltan bendir til þá virðast það eingöngu ná til raftækjaverslunar þar sem verslun með aðrar sérvörur er enn ekkert að taka við sér. Verslun með skó, föt og húsgögn er þannig enn að dragast saman að raunvirði í september borið sama við sama tímabil fyrra árs," segir í Morgunkorninu þar sem fjallað er um yfirlit frá Rannsóknarsetri verslunarinnar sem birt var í gærdag.

Mest dróst velta í verslun með föt saman, eða um 13,9%, og um 11,7% með skó. Velta með húsgögn dróst saman um 2,3% frá sama mánuði fyrra árs og velta sérverslana með rúm minnkaði um 16,7% í september síðastliðnum miðað við sama mánuð fyrra árs. Þessar tölur benda til þess að húsgagnaverslun sé enn í mikilli lægð, en að raunvirði hefur velta húsgagnaverslana minnkað um 55% frá því í ágúst 2007.