Eurostat mældi 5,9% verðbólgu hérlendis í ágúst

Fjallað er um málið í Morgunkorni greiningar Íslandsbanka. Þar segir að á þennan mælikvarða hefur verðbólgan hjaðnað umtalsvert síðasta árið en í ágúst í fyrra mældist hún 16,0%.

Meginástæða lækkunarinnar er að áhrif gengislækkunar krónunnar á verðbólgu sem varð í aðdraganda og samhliða hruni bankakerfisins hér á landi á árinu 2008 eru nú nær horfin og tekin eru við áhrif styrkingar krónunnar frá upphafi árs.

Í samanburði við önnur ríki Evrópska efnahagssvæðisins (EES) var verðbólgan næstmest hér á landi í ágúst. Þetta er annar mánuðurinn í röð sem Ísland trónir ekki á toppnum á þessum lista en eins og kunnugt er þá hafði verðbólgan mælst mest hér á landi allt frá ágúst 2008.

Í ágúst síðastliðnum mældist verðbólgan mest í Rúmeníu en þar var hún 7,6%. Það land sem kemur á eftir Íslandi á listanum er Grikkland en þar var verðbólgan 5,6% og næst á eftir kemur Ungverjaland með 3,6% verðbólgu. Verðbólgan minnkar lítillega milli júlí og ágúst innan ríkja EES, eða úr 2,1% í 2,0%.

Aðeins tvö ríki upplifðu ástand verðhjöðnunar í ágúst og er það annars vegar Írland þar sem samræmd vísitala neysluverðs hefur lækkað um 1,2% yfir síðustu tólf mánuði og hins vegar Lettland en þar nemur lækkunin 0,4%. Ekki er við öðru að búast en að munurinn á Íslandi og öðrum EES-löndum haldi áfram að fara minnkandi næsta kastið, að því er segir í Morgunkorninu.