Slitastjórn Kaupþings hefur stefnt inn 60 riftunarmálum

Slitastjórn Kaupþings hefur stefnt 60 riftunarmálum fyrir dómstóla og er fjöldi annarra riftunarmála og aðgerða í undirbúningi og mun þeim verða framfylgt á næstunni.

Um er að ræða riftun á lánveitingum og öðrum viðskiptum gamla Kaupþings. Slitastjórnin réð endurskoðunarskrifstofuna PWC til að kanna grundvöll fyrir riftunarmálum og er sú vinna enn í gangi. Ólafur Garðarsson, formaður slitastjórnar, segir að það komi í ljós á næstu mánuðum hvort fyrrverandi stjórnendum eða öðrum verði stefnt til greiðslu skaðabóta.

Slitastjórnin fundaði með kröfuhöfum bankans í morgun en hún hefur nú lokið því verkefni að taka afstöðu til allra krafna. Heildarfjárhæð þeirra kafna sem slitastjórnin hefur endanlega samþykkt nemur rúmum 400 milljörðum en kröfum að fjárhæð 700 milljarða hefur verið hafnað.

Í meðfylgjandi myndskeiði má sjá viðtal sem Sigríður Mogensen fréttamaður tók við Ólaf Garðarsson að loknum kröfuhafafundi í morgun.