Blóðtaka fyrir ríkissjóð ef Actavis fer úr landi

Ef Actavis verður yfirtekið af Deutsche Bank hefur það ekki neina afgerandi þýðingu fyrir íslenskt efnahagslíf að undanskildu að íslenska ríkið fer á mis við töluvert af skattekjum, að sögn Ásgeirs Jónssonar, hagfræðings. Það er þó háð því bankinn færi höfuðstöðvarnar úr landi, en engar vísbendingar eru um að það verði raunin.

Ásgeir Jónsson segir að þegar erlendir aðilar skoði Ísland og skuldastöðu íslenskra fyrirtækja skoði þeir heildarskuldastöðu fyrirtækjanna. Þess vegna sé m.a vikið að samtölu erlendra skulda íslenskra fyrirtækja í skýrslu Alþjóðagjaldeyrissjóðsins vegna efnahagsáætlunar fyrir Ísland, en þar birtist samheitalyfjafyrirtækið Actavis með þúsund milljarða króna í erlendum skuldum, en skuldirnar eru 70 prósent af vergri landsframleiðslu Íslands.

Meira en 90 prósent tekna frá erlendum mörkuðum

Deutsche Bank fjármagnaði að langstærstum huta yfirtöku Novators á Actavis sumarið 2007. Eins og fréttastofa greindi frá í gær samkvæmt heimildum hafa verið gerð drög að samkomulagi um yfirtöku þýska bankans á meirihluta í fyrirtækinu, en Björgólfur Thor Björgólfsson eigandi Novators hefur hafnað því að slík áform séu uppi á borðum.

Að sögn Ásgeirs Jónssonar er tilhneiging hjá fyrirtækjum að ráða starfsfólk frá því landi sem það hefur höfuðstöðvar. Því ætti erlent eignarhald á Actavis, ef það verður einhvern tímann að veruleika, ekki að hafa teljandi áhrif á starfsmannahaldið. Jafnframt hefur verið bent á að óábyrgt sé að skipta út stjórnendum og starfsfólki sem hafi byggt upp sérþekkingu á viðkomandi markaði um langa hríð.

Þegar Björgólfur Thor keypti aðra hluthafa út úr Actavis sumarið 2007 með 5 milljarða evra láni frá Deutsche Bank, hundrað milljóna evra láni frá Kaupþingi og 206 milljóna evra láni frá Landsbankanum í Lundúnum, átti sér stað gríðarleg innspýting fjármagns inn í íslenskt efnahagslíf. Þessum peningum var varið af stórum hluta með fjárfestingu hér á landi með jákvæðum afleiðingum fyrir íslensk fyrirtæki og atvinnulíf.