Deutsche Bank að yfirtaka Actavis - Björgólfur í minnihluta

Björgólfur Thor Björgólfsson er að missa samheitalyfjafyrirtækið Actavis í hendur Deutsche Bank. Drög að samkomulagi um yfirtöku bankans á fyrirtækinu liggja fyrir, en þau gera ráð fyrir að Björgólfur haldi áfram utan um minnihluta í fyrirtækinu.

Þegar Novator, fjárfestingarfélag Björgólfs Thors Björgólfssonar, keypti aðra hluthafa út úr Actavis með 5 milljarða evra láni frá Deutsche Bank árið 2007 og smærri lánum frá Landsbankanum og Kaupþingi var um að ræða stærstu yfirtöku Íslandssögunnar. Skuldir vegna yfirtökunnar nema nú rúmlega 900 milljörðum króna. Actavis hefur verið í söluferli í meira en ár, en ekki hefur fengist viðunandi verð og Deutsche Bank er með veð í hlutabréfum félagsins.

Nú er svo komið að og engar meiriháttar ákvarðanir eru teknar um framtíð rekstrar Actavis nema að fengnu samráði við Deutsche Bank. Þá liggja fyrir drög að samkomulagi um yfirtöku þýska bankans á fyrirtækinu, samkvæmt heimildum fréttastofu. Þau fela í sér að Björgólfur verði áfram hluthafi, en í algjörum minnihluta.

Erlendar skuldir Actavis eru rúmlega 1.000 milljarðar króna og eru á gjalddaga á árunum 2014 til 2016. Skuldirnar nema 70 prósent af vergri landsframleiðslu Íslands. Actavis er skráð á Íslandi þótt þorri starfseminnar sé erlendis. Ljóst er að erlend skuldastaða þjóðarbúsins mun líta allt öðruvísi og betur út ef Deutsche Bank tekur félagið yfir sem margt bendir nú til að verði raunin.

Björgólfur Thor Björgólfsson segir í yfirlýsingu sem hann sendi fréttastofu að núverandi stjórn Actavis ráði stefnumótun og rekstri félagsins. Engin áform séu uppi um að lánardrottnar breyti skuldum í hlutafé. Actavis hafi átt í mjög góðu samstarfi við lánardrottna um skuldastöðuna og eigi enn.

Sigurður Óli Ólafsson, forstjóri Actavis, vildi ekki tjá sig um samskiptin við Deutsche Bank í samtali við fréttastofu.