Ástarbréfin sögð málamyndagjörningur

Slitastjórn Sparisjóðabanka Íslands segir að yfirmenn Seðlabankans hafi leynt raunverulegri stöðu viðskiptabankanna rétt fyrir hrun þegar Seðlabankinn lánaði bankanum ríflega tvöhundruð milljarða króna í endurhverfum viðskiptum. Þessir samningar hafa síðan verið kallaðir ástarbréf.

Á kröfuhafafundi sem haldinn var í gær gerði slitastjórnin kröfuhöfum Sparisjóðabankans grein fyrir málinu og færði rök fyrir því að kröfu ríkissjóðs á hendur bankanum sé hafnað. Seðlabankinn lánaði Sparisjóðabankanum fjárhæðirnar rétt fyrir hrun og bankinn lánaði síðan áfram til viðskiptabankanna sem féllu stuttu síðar.

Að mati slitastjórnar var um málamyndagjörning að ræða. Slitastjórnin segir ennfremur að ástarbréfunum hafi verið ætlað að sjá viðskiptabönkunum fyrir lausafé en að svo virðist sem yfirmönnum í Seðlabankanum hafi verið ljós sú áhætta sem Sparisjóðabankinn væri að taka á sig með viðskiptunum. Að auki segir slitastjórnin að svo virðist sem gjörningurinn hafi verið andstæður lögum um Seðlabanka Íslands og brot á vinnureglum bankans.

Kynningu frá fundi kröfuhafa má sjá hér.