Skuldari góður – Eignarréttur ER einkaeign lánveitanda

Eins og margoft hefur komið fram í fjölmiðlum, þá er eignarréttur lánveitanda óumdeildur. Sá eignarrétur á við um höfuðstól láns, vexti og verðbætur lánsins, og einnig innheimtukröfur og alla þá forsendubresti sem ríkistjórn eða bönkum tekst að skapa.

Með einbeittum vilja má skilja 72.gr stjórnarskrárinnar á þennan hátt.

Skuldari góður, reyndu að skilja þetta. Hvernig á þjóðfélagið annars að geta gengið.

Við höfum verið svo heppin að hafa getað kosið okkur ríkisstjórn sem skilur þetta, og hefur barist hetjulega fyrir stjórnarskrárbundnum eignarrétti lánastofnana og einnig tilvist þeirra.

Þú hlýtur einnig að skilja, að ráðamenn okkar og Seðlabanki Íslands, hefðu aldrei látið 400 hundruð þúsund milljónir íslenskra króna í bankakerfið, ef þeir væru ekki nauðsynlegir hagkerfi okkar og ómissandi sem stofnanir í almannaþágu.

Þetta er reyndar ekki nema tíföld ICESAVE skuld þjóðarinnar. Hlutfallið væri reyndar bara tvöföld ICESAVE skuld, ef forseti vor hefði ekki verið svo óforskammaður að hindra störf ráðamanna um síðustu áramót.

Ef þú ert loksins farinn að skilja ótvíræðan eignarrétt lánveitanda, þá ættir þú einnig að vera farinn að gera þér grein fyrir því, að þótt þú hafir einungis veðsett 60% af eign þinni, þá væri það ósanngjarnt af þér að ætlast til að forsendubrestur lánsins væri á nokkurn hátt á ábyrgð bankans.

Þess vegna er eignarréttur þinn á seinni 40% af eigninni, í raun aldrei þinn eignarréttur, einungis má segja að þú hafir haft afnotarétt af þessum 40%, þar til bankinn þyrfti á honum að halda. Í almannaþágu auðvitað. (sjá 72.gr stjórnarskrár: "Engan má skylda til að láta af hendi eign sína nema almannaþörf krefji". Verður ekki skýrara)

En nú hefur komið í ljós að þú hefur skaðað þinn lánveitanda. Skuldin er komin langt upp fyrir verðmæti eignarinnar sem þú settir að veði. En viðbrögð lánveitandans eru með ólíkindum, því þrátt fyrir þetta tjón sem þú ollir honum, þá er hann að vinna hörðum höndum, með okkar lýðræðiskjörnu stjórnvöldum, að finna lausn á skuldavanda þínum.

Þetta er skýlaust dæmi um samfélagslegan þroska lánveitanda, sem vinnur langt umfram sína skyldu. Heyrst hefur, að nú ætli lánastofnanir jafnvel að "gefa" þér og þínum líkum, fullt af milljörðum, sem koma mun úr þeirra eigin vasa. Það virðist sem engin takmörk séu fyrir góðverkunum.

Þetta staðfestir enn og aftur framsýni stjórnvalda og réttsýni, sem

ákváðu að mynda skjaldborg um að rýra ekki skuldir heimilanna, hjá lánveitendum og láta frekar öll önnur fyrirtæki í þrot, enda engin góðmennska í þeim fyrirtækjum.

Lifið heil í sátt við lánveitendur og skuldir.

(p.s. ef einhver er sammála innihaldi þessa bréfs, þá vinsamlegast látið ekki í ykkur heyra.)