Menningarhátíðin Pönk á Patró verður haldin tvo laugardaga í sumar á Patreksfirði. Ein hljómsveit mætir í hvort skipti og verður reynt að ná til allra aldurshópa.
„Við fengum þetta hugarfóstur þegar við vorum við nám á Bifröst. Nú er þetta bara að gerast og spenningurinn er mikill! Það er líka alveg frábært að fólk er að taka mjög vel í þetta,“ segir Jóhann Ágúst Jóhannsson, annar skipuleggjenda tónlistarhátíðarinnar Pönk á Patró á Patreksfirði.
Jóhann Ágúst og Alda Davíðsdóttir halda tónlistarhátíðina Pönk á Patró í fyrsta sinn laugardaginn, 26. júní. Hátíðin verður haldin tvo laugardaga í sumar og ein hljómsveit mætir í hvort skipti og verður reynt að höfða til allra aldurshópa.
Það verða Heiðar, Halli og félagar í Pollapönk sem ríða á vaðið á laugardaginn. Amiina kemur svo fram laugardaginn 7. ágúst með frumsamda tónlist. Amiina ætlar einnig að sýna sígildar hreyfimyndir Lotte Reiniger úr ævintýrunum um Þyrnirós, Öskubusku og Aladdín. Vestfirski tónlistarmaðurinn 7oi hitar upp fyrir Amiinu.
„Það er mikilvægt að taka það fram til að forðast allan misskilning að pönkið sem hér um ræðir er fólgið í athöfninni og frumleikanum, sögninni að gera eða að láta vaða,“ segir Jóhann.
„Það vísar ekki beint til tónlistarinnar því við komum til með að vera með fjölbreytilegri tónlist en bara pönk. Það skal þó taka það fram að tónlistin verður í aðalhlutverki.“
Hver og einn viðburður verður einstakur en ramminn er alltaf sá sami. Yfir daginn verður tónlistarsmiðja fyrir börn og unglinga. Þar fá tónlistarmennirnir tækifæri til að mynda tengsl við yngri kynslóðina með því að segja þeim sögur, sýna þeim hljóðfæri og svara spurningum áður en þeir halda svo smá tónleika fyrir þau.
Meðan á þessu stendur gefst foreldrum tækifæri til að skoða sig um og sækja markað í næsta húsi. Einnig verða sýndar gamlar íslenskar tónlistarmyndir í Skjaldborgarbíói, en þar verður foreldrapössun.
Um kvöldið er síðan seinni dagskrárliðurinn. Þá mætir Dr. Gunni og stendur fyrir Popppunktsspurningakeppni auk þess sem hljómsveitirnar slá upp tónleikum fyrir alla aldurshópa. Verðinu á þessum dagskrárlið verður haldið í lágmarki en ókeypis er á viðburðina yfir daginn.
linda@frettabladid.is
