Styð Guðmund Vigni

Nú stendur fyrir dyrum kosning til stjórnlagaþings sem á að gera tillögur um nýja stjórnarskrá fyrir lýðveldið Ísland.

Hvers konar fólk á erindi á stjórnlagaþing?

Hvaða grunngildi eiga að vera þar leiðarljós?

Að mínu áliti á stjórnlagaþing að skipa "venjulegt fólk", fólk sem hefur reynslu úr íslensku þjóðlífi, hæfileikaríkt fólk sem liggur ekki í skotgröfum stjórnmálaflokka. Fólk sem lætur málefnin ráða en ekki hagsmuni flokks, vina, vandamanna eða sjálf sín. Fólk sem er réttsýnt og víðsýnt og lætur ekki stjórnast af valdagræðgi

Þau grunngildi sem ég tel að leggja eigi megináherslu á eru: virkt lýðræði, siðvit og samábyrgð.

Virkt lýðræði blómstrar í vel upplýstu samfélagi þar sem hver einstaklingur er fær um að mynda sér sjálfstæðar skoðanir, tjá þær og rökstyðja. Þar sem fólk talar saman á jafnréttisgrunni, í þeim tilgangi að komast að niðurstöðu. Þetta er alls ólíkt því sem við sjáum í viðtalsþáttum fjölmiðla þar sem andstæðingum er att saman í þeim tilgangi að koma höggi á einhvern. Persónulega finnst mér fjölmiðlar hafa brugðist því hlutverki að stuðla að uppbyggingu betra samfélags og finna lausnir.

Þegar fólk ræðir saman í eindrægni, eins og gerðist á þjóðfundum undanfarið, kemur í ljós að það er í raun mikill samhljómur um ákveðin grunngildi, s.s. jafnrétti, mannréttindi, virðingu og tjáningarfrelsi. Þarna birtust þau gildi sem mér finnst að eigi að vera grundvöllur að nýrri stjórnarskrá lýðveldisins Íslands.

Samábyrgð er hugtak sem hefur orðið undir í gróðafíkninni, síngirninni og valdagræðginni sem hampað var á undanförnum árum. Eiginhagsmunastefna markaðsaflanna hefur beðið skipbrot.

Við lifum öll hér saman, á okkar heimili, í okkar sveitarfélagi, í okkar landi og á okkar jörð. Við verðum að vinna saman og sjá til þess að skila lífvænlegri jörð í hendur afkomenda okkar.

Þetta hljómar nú eins og framboðsræða og er það líka.

Vinur minn, Guðmundur Vignir Óskarsson er einn þeirra sem boðið hafa sig fram til stjórnlagaþings.

Guðmundur Vignir er ósérhlífinn, vinnusamur, skynsamur og víðsýnn. Hann er með sterka réttlætiskennd og myndi aldrei setja eiginhagsmuni ofar hagsmunum almennings. Hann er mannvinur sem þekkir mannlífið mörgum öðrum betur.

Ég treysti honum umfram flesta aðra til að vinna að þeim gildum sem ég hef lýst hér að framan og mun því gefa honum mitt atkvæði á kjördag 7-9-13.