Snorri: Ekki auðvelt að yfirgefa GOG

„Þetta er búinn að vera mjög sérstakur dagur. Ég æfði með GOG í morgun, er á leið upp í flugvél á eftir og æfi með Löwen í kvöld. Svo spila ég væntanlega með liðinu á morgun," sagði Snorri Steinn Guðjónsson, nýjasti liðsmaður þýska félagsins Rhein-Neckar Löwen sem þeir Guðjón Valur Sigurðsson og Ólafur Stefánsson leika með.

„Þetta bar brátt að en þeir höfðu samband í upphafi vikunnar. Nú nokkrum dögum síðar er ég farinn til Þýskalands. Það er ekki auðvelt að yfirgefa GOG þar sem mér hefur liðið vel. Mér leist líka vel á framhaldið og sérstaklega þar sem Gummi [Guðmundur Guðmundsson landsliðsþjálfari] er tekinn við liðinu. Ég hef mikla trú á að hann eigi eftir að gera flotta hluti með þetta lið," sagði Snorri en fjárhagsvandræði GOG gerðu það að verkum að þeir ákváðu að selja hann.

Snorri gerir aðeins eins árs samning við Löwen en heilsufarsástand Snorra gerði það líklega að verkum að hann fær aðeins stuttan samning.

„Það er smá áhætta fólginn í því að gera stuttan samning en ég gat samt ekki hafnað þessu tækifæri. Ég hef ekki verið í svona góðu standi í mörg ár og stefni á að nýta tækifærið og sanna mig hjá félaginu," sagði Snorri Steinn ákveðinn.