Redknapp: Keane er frábær

Harry Redknapp, stjóri Tottenham, segir að hann væri lygari ef hann segði að hann vildi ekki fá Robbie Keane aftur á White Hart Lane. Keane hefur alls ekki fundið sig í herbúðum Liverpool og var ekki í leikmannahópi liðsins um nýliðna helgi.

Keane var keyptur fyrir 20 milljónir punda í sumar en nú ríkir mikil óvissa um framtíð hans og jafnvel talið að hann gæti verið á leið frá Anfield í janúar. Hann hefur verið orðaður við endurkomu í Tottenham.

„Ég væri að sjálfsögðu til í að fá Robbie Keane. Ég hef mikið álit á honum sem leikmanni og persónuleika. Mér finnst hann frábær. En hann er hjá Liverpool og því ekki mögulegur kostur sem stendur," sagði Redknapp.