Þokast í átt til sáttar innan stjórnarliðsins

Ögmundur Jónasson heilbrigðisráðherra hefur góða von um að viðunandi lausn finnist á Icesave-málinu og að það hljóti samþykki. „Ég er vongóður um að við náum sameiginlegri lausn ef menn sýna allir góðan samstarfsvilja," sagði hann í samtali við Fréttablaðið í gærkvöldi. Kvaðst hann hafa af því spurnir að innan fjárlaganefndar væru menn á réttri leið, að hans mati.

Formenn stjórnarflokkanna; Steingrímur J. Sigfússon og Jóhanna Sigurðardóttir ræddu um Icesave-málið á sérstökum fundi með Ögmundi fyrir ríkisstjórnarfund í gærmorgun.

Steingrímur segir málið hafa þokast í samkomulagsátt í gær og að hann telji að frumvarp ríkisstjórnarinnar um Icesave-ábyrgðirnar hljóti samþykki Alþingis.

Enn er óvíst hvenær fjárlaganefnd afgreiðir málið frá sér.

Steingrímur segir betra að málið dragist ekki úr hömlu, þó ekki sé um klukkutímaspursmál að ræða. „Ég bíð þess tiltölulega rólegur að málinu verði lokað, svo við getum snúið okkur að öðrum brýnum verkefnum."

Aukinnar bjartsýni um málslyktir gætti meðal þingmanna úr báðum stjórnarflokkunum í gærkvöldi. Töldu þeir bilið milli andstæðra sjónarmiða hafa minnkað við fundi og samtöl gærdagsins.

Ögmundur hafði þar til í gær lýst sig andsnúinn hugmyndum meirihluta fjárlaganefndar að fyrirvörum við ríkisábyrgð á Icesave-samningunum. Að sama skapi taldi meirihlutinn sig ekki geta fallist á ýtrustu kröfur Ögmundar.

Eftir því sem Fréttablaðið kemst næst er það ekki eitthvað eitt tiltekið atriði sem gerir það að verkum að menn telji að þokast hafi í sáttaátt. Ástæðan sé fremur aukinn vilji til sáttar. Raunveruleg hætta á að ríkisstjórnin hrökklist frá völdum, njóti Icesave-málið ekki stuðnings ráðherra, ráði þar miklu. Þá hafi loftið hreinsast milli manna á fundum gærdagsins.