Starfsmenn allra miðla í skoðun hjá rannsóknarnefnd Alþingis

Rannsóknarnefnd Alþingis um bankahrunið mun óska eftir starfsmannalistum frá öllum fjölmiðlum landsins og er ætlunin að kanna hvort starfsmenn fjölmiðla hafi notið óeðlilegrar fyrirgreiðslu hjá bönkunum.

Frá því er greint í Fréttablaðinu í dag að nefndin hafi óskað eftir lista yfir það starfsfólk 365 sem fjallað hefur um efnagsmál á miðlum fyrirtækisins. Þá vill nefndin fá lista yfir stjórnarmenn, forstjóra og aðra yfirmenn hjá 365 frá áinu 2004. Páll Hreinsson formaður rannsóknarnefndarinnar staðfestir í samtali við fréttastofu að allir miðlar landsins verði kannaðir á þennan hátt.

Páll segir að til standi að búa til rannsóknarþýði þar sem kannað verði hvort viðkomandi hafi verið að fá óeðlilega fyrirgreiðslu í bankakerfinu. Þessi listi fjölmiðlamanna sé aðeins einn af mörgum. „Við höfum aðgang að bönkunum og getum þannig séð hvort fólk hafi notið óeðlilegrar fyrirgreiðslu," segir Páll. Að sögn hans mun nefndin ekki birta neinar niðurstöður fyrr en í skýrslu nefndarinnar sem gert er ráð fyrir að komi út þann 1. nóvember næstkomandi.