Útskriftarferð til Mallorca: Er óróleg yfir hryðjuverki

„Við erum að fara að vera í Palmanova - þar sem sprengingin var í dag," segir Sólrún Sigvaldadóttir, fráfarandi formaður nemendafélags MK. Árgangur hennar fer í útskriftarferð til eyjunnar Mallorca næsta miðvikudag, en mannskætt hryðjuverk átti sér stað í dag í sama bæ og þau koma til með að dvelja.

Sólrún segist aðspurð að sjálfsögðu vera óróleg yfir sprengjunni, þó vinkona hennar sem tekur þátt í skipulagningu ferðarinnar segist ekkert smeyk. Samgöngur til og frá eyjunni hafi verið stöðvaðar og málið verði áreiðanlega leyst áður en hópurinn kemur út.

Þær munu tala við ferðaskrifstofuna sína á morgun og fá mat hennar á stöðunni.

„Ég hugsaði hvort það væri hægt að tala við ferðaskrifstofuna og reyna að fá annað hótel eða annan bæ. Við getum athugað það. En það er náttúrulega svo stutt í þetta," segir Sólrún, sem telur aðspurð þrátt fyrir allt líklegast að þau muni fara í ferðina og reyna að skemmta sér.

Hópurinn verður á eyjunni í tvær vikur.