Snorri Steinn seldur til Rhein-Neckar Löwen

Þrír af bestu handknattleiksmönnum þjóðarinnar munu allir spila með þýska félaginu Rhein-Neckar Löwen í vetur. Í dag var Snorri Steinn Guðjónsson nefnilega seldur frá GOG til Löwen.

Þessi tíðindi eru staðfest á heimasíðu GOG í dag.

Þar kemur fram að GOG hafi ekki getað hafnað freistandi tilboði Löwen í Snorra en GOG er í miklum fjárhagsörðugleikum. Framkvæmdastjóri félagsins segir að félagið muni sakna Snorra en hafi ekki getað staðið í vegi fyrir honum.

Snorri mun skrifa undir samning við Löwen í dag og hugsanlega spila með liðinu um helgina.

„Mér hefur liðið vel hjá GOG og mun sakna margs héðan. Það er engu að síður minn draumur, og hefur verið síðan ég var barn, að spila með einu af bestu liðum heims og því gat ég ekki hafnað þessu tilboði," sagði Snorri í samtali við heimasíðu GOG.