Vill að stjórnendur Kaupþings leysi ágreining sinn sjálfir

„Ég ætla ekki að blanda mér í þessa deilu. Ég treysti því bara að Kaupþingsmenn leysi þetta sjálfir," segir Gylfi Magnússon viðskiptaráðherra um bréfið sem stjórnarformaður Kaupþings sendi á alla starfsmenn bankans í gær.

Í bréfinu, sem er frá Huldu Dóru Styrmisdóttur stjórnarformanni bankans, segir að stjórn bankans hafi ekki átt þátt í ákvörðun Finns Sveinbjörnssonar bankastjóra síðastliðinn laugardag um lögbann á fréttaflutning RÚV af lánabókum bankans sem hafi þegar verið komnar á netið. Stjórn bankans harmi þann skaða sem af málinu hafi hlotist fyrir orðspor bankans.

Aðspurður segist Gylfi ekki eiga von á því að þessi atburður hafi áhrif á það ferli sem nú er í gangi við að koma bankanum í eigu kröfuhafa. „Auðvitað er ekki gott fyrir bankann, frekar en önnur fyrirtæki, ef það er einhver ágreiningur innan stjórnendahópsins. En ég sé ekki ástæðu til að ætla annað en að hann ráði bara frammúr þessu," segir Gylfi.

Þrátt fyrir ítrekaðar tilraunir hefur Vísir hvorki náð tali af Huldu Dóru Styrmisdóttur né Finni Sveinbjörnssyni í dag.