Ríkislögreglustjóri vill sex lögreglustjóra á landinu

„Ég get tekið undir þá skoðun að nýframkomin hugmynd þriggja manna starfshóps dómsmálaráðherra um einn lögreglustjóra yfir landinu öllu er afar róttæk, segir Haraldur Jóhannessen ríkislögreglustjóri við fyrirspurn Vísis. Dómsmálaráðherra kynnti hugmynd starfshópsins fyrir lögreglustjórum í síðustu viku.

„Embætti ríkislögreglustjóra hefur sett fram þá hugmynd að lögregluumdæmin verði stækkuð frá því sem nú er og verði 6 talsins undir stjórn lögreglustjóra hvers umdæmis. Einnig að sérstakur lögreglustjóri fari með rannsóknarlögreglu á landsvísu. Þetta fyrirkomulag yrði undir umsjón ríkislögreglustjóra og rúmast ágætlega innan núverandi fyrirkomulags lögreglumála og tekur mið af þeim fjárhagsvanda sem við er að etja. Verkefni gætu færst frá embætti ríkislögreglustjóra til lögregluumdæma eftir því sem hagkvæmt þykir hverju sinni," segir Haraldur.

Haraldur segir hins vegar rétt að vekja athygli á því að endanleg ákvörðun um framtíðarskipulag lögreglumála liggi ekki fyrir og mikil vinna sé framundan í þeim efnum. „Embætti ríkislögreglustjóra vinnur nú fyrir ráðherra að skilgreiningu á grunnþjónustu lögreglunnar sem unnt er að nota sem grundvöll að ákvörðun um inntak lögreglustarfsins, áætlun um mannaflaþörf í lögregluumdæmum og fleira," segir Haraldur.