Ásgeir Örn: Hrikalega sætt

Ásgeir Örn Hallgrímsson var hæstánægður með sigur Íslands á Makedóníu í kvöld en hann skoraði fjögur mörk í leiknum.

Ásgeir hefur átt við meiðsli að stríða en stóð sig vel í leiknum, rétt eins og aðrir leikmenn íslenska liðsins.

„Það var mikil upplifun að vinna í þessari höll og hrikalega sætt."

Hann sagði að áhorfendur hafi látið vel í sér heyra í leiknum. „Það var vel púað á okkur þegar við vorum kynntir til leiks en þegar við fórum að standa í þeim þagnaði aðeins í mannskapnum. En þeir höguðu sér nokkuð vel og var lítið reynt að kasta aðskotahlutum inn á völlinn."

Ísland var án margra lykilmanna í leiknum í kvöld og sagði Ásgeir að vissulega hafi það haft áhrif á undirbúninginn.

„En við sýndum í kvöld að við erum með marga góða leikmenn. Við þjöppuðum okkur bara vel saman fyrir leikinn og það skilaði sér."