Vörukarfa ASÍ ódýrust í Bónus

Um 8,1 % verðmunur reyndist á matvörukörfu ASÍ þegar verð var kannað í lágvöruverðsverslunum í gær. Vörukarfan var ódýrust í Bónus þar sem hún kostaði kr. 12.421 en dýrust í Nettó kr. 13.422.

Vörukarfan samanstendur af 71 almennum neysluvörum til heimilisins, svo sem mjólkurvörum, osti, brauðmeti, morgunkorni ávöxtum, grænmeti, áleggi, kjöti, drykkjarvörum, ásamt ýmsum pakkavörum, dósamat ofl. Við útreikning á verði vörukörfunnar er tekið mið af því hvar neytandinn fær mesta magn af ákveðnum matvöru fyrir sem lægst verð.

Könnunin var gerð í Bónus Hallveigarstíg, Krónunni Bíldshöfða, Nettó í Hverafold og Kaskó Vesturbergi.