Jackson Richardson til Rhein-Neckar Löwen

Guðjón Valur Sigurðsson og félagar hans í Rhein-Neckar Löwen hafa fengið góðan liðsstyrk út tímabilið. Einn besti handboltamaður sögunnar, Jackson Richardson, mun spila með liðinu út leiktíðina.

Hann gerir tveggja mánaða samning við Löwen sem tókst að draga skóna hans fram að nýju. Frakkinn lék með Grosswallstadt í Þýskalandi á árunum 1997 til 2000 áður en hann fór til Portland San Antonio á Spáni.

Hann gekk síðan í raðir Chambéry Savoie Handball í heimalandi sínu 2005 og hætti að leika með liðinu á síðasta ári. Hann lagði skóna á hilluna en hefur nú dregið þá fram á nýju.

Hann er marg verðlaunaður leikmaður og verður án efa hvalreki á fjörur Löwen, sýni hann brot af þeim töktum sem gerðu hann meðal bestu leikmanna heims.