Guðjón frábær í sigri Löwen

Guðjón Valur Sigurðsson var einn besti maður vallarins í sigri Rhein-Neckar Löwen á Gummersbach í frábærum leik í þýsku úrvalsdeildinni í handbolta í dag.

Guðjón skoraði sex mörk, þar af fimm úr vítum. Tvö þeirra fiskaði hann sjálfur auk þess sem hann stýrði sóknarleik Löwen vel.

Róbert Gunnarsson var í strangri gæslu en hann skoraði eitt marka Gummersbach. Hann lét þó vel til sín taka, fiskaði víti og brottrekstra.

Gummersbach var einu marki yfir í hálfleik, 15-14 og komust svo í 18-15. Löwen náði aftur á móti að jafna og komast í 20-23.

Gummersbach var þó aldrei langt undan og munurinn var eitt til tvö mörk út leikinn. Þeir minnkuðu muninn í eitt mark þegar rúm mínúta var eftir eftir að Löwen hafði leitt 28-31.

Löwen fór í sókn en gekk illa að finna leið framhjá vörninni og fékk dæmt á sig leiktöf. Gummersbach fór í sókn, skutu í hliðarnetið en fengu aukakast þegar leiktíminn rann út sem Momir Ilic nýtti ekki.

Löwen reyndist þó sterkari og er í þriðja sætinu rétt á eftir Hamburg sem er í öðru sæti deildarinnar. 

Kiel er sem fyrr lang efst með 52 stig, en Hamburg hefur 41. Gummersbach er í áttunda sæti deildarinnar með 32 stig.