Birgir Leifur í vandræðum í dag: Sex skollar og einn skrambi

Það gekk lítið upp hjá atvinnukylfingnum Birgi Leifi Hafþórssyni á öðrum degi á opna portúgalska mótinu á Evrópumótaröðinni. Eftir daginn eru litlar líkur á að hann komist í gegnum niðurskurðinn eftir að hafa spilað annan hringinn á fjórum höggum yfir pari.

Þetta var sveiflukenndur dagur því Birgir Leifur var með fjóra fugla, sex skolla og einn skramba á litríkum hring. Hann hefur nú leikið fyrstu 36 holurnar á 144 höggum eða tveimur höggum yfir pari.

Birgir Leifur byrjaði daginn vel, paraði fyrstu þrjár holurnar og fékk síðan fugl á þeirri fjórðu. Birgir Leifur var þá kominn þremur höggum undir par.

Næstu fimm holur áttu hinsvegar eftir að breyta öllu því Birgir fékk fimm skolla í röð sem þýddu að hann var kominn tveimur höggum yfir par og í hættu að ná ekki niðurskurðinum.

Birgir Leifur fékk fugl á 11. holu en fylgdi honum eftir með skolla á 12. og fékk síðan skramba á 14. holu. Birgir Leifur var þá kominn fjórum höggum yfir par.

Birgir náði samt að klára hringinn glæsilega með tveimur fuglum og tveimur pörum en staðan er engu að síður ekki nægilega góð. Hann er sem stendur í 82. sæti og einu höggi frá því að ná niðurskurðinum.