Ómar Ragnarsson fordæmir ofbeldisfull mótmæli

„Að sparka í höfuð einhvers er einhvert hættulegasta athæfi sem hugsast getur, því að fæturnir eru miklu öflugri en handleggirnir og auk þess oft um harða skó að ræða sem lenda í höfði þess sem sparkað er í," skrifar náttúruverndarsinninn Ómar Ragnarsson á bloggið sitt í kvöld.

Tilefnið er handtaka fimm einstaklinga fyrir utan iðnaðarráðuneytið síðdegis í dag. Lögreglan segir þá hafa sparkað í höfuð lögreglumanns en frá því var greint á fréttavef Morgunblaðsins.

Sömu mótmælendur köstuðu grænu skyri á ráðuneytið og lúxusbifreið ráðherrans. Tilefni mótmælanna var undirskrift fjármögnunarsamnings vegna álvers í Helguvík.

Ómar er ósáttur við líkamlegt ofbeldi mótmælendanna. Sjálfur er hann einn frægast baráttumaður landsins fyrir náttúruvernd og fékk meðal annars 15 þúsund manns til þess að ganga með sér niður Laugaveginn árið 2007 til þess að mótmæla Kárahnjúkum.

Ómar setur þó þann fyrirvara á að það sé rétt að mótmælendur hafi sannarlega orðið uppvísir af ofbeldisfullu lögbroti.

„Ef það er rétt að maður hafi sparkað í höfuð lögreglumanns er það forkastanlegt og gildir einu hvað manninum gengur til," skrifar Ómar sem skilur illa ofbeldið.

Að lokum frábiður hann sér tengingar bloggara við slíkt athæfi og skrifar:

„Ég frábið mér að að vera spyrtur við slíkt athæfi eins og nú er gert á blogginu, en þar er meðal annars sagt að þetta sé "týpiskt fyrir málstað grænna."