Þýskur ferðamaður handtekinn eftir átök við Bónus

Lögregla handtók í dag að því talið er þýskan ferðamann við verslun Bónus í Hafnarfirði. Maðurinn hafði að sögn lögreglu gert sig líklegan til að ganga út úr versluninni með talsvert af vörum án þess að greiða fyrir.

Starfsfólk Bónus stöðvaði manninn og kallaði til lögreglu, en þegar hana bar að garði var maðurinn óviðræðuhæfur og bullaði. Þegar lögregla gerði sig líklega til að flytja manninn á lögreglustöð svo þetta uppgjör færi ekki fram fyrir allra augum streittist maðurinn á móti.

Var hann þá snúinn niður, handtekinn og færður í járnum á lögreglustöðina á Hverfisgötu, en vegfarandi sem hafði samband við fréttastofu sagði það hafa verið mjög átakanlegt að horfa upp á. Maðurinn er talinn vanheill andlega.