Þrír munu gera tilboð í Morgunblaðið

Búast má við að hið minnsta þrír aðilar muni bjóða í Árvakur, útgáfufélag Morgunblaðsins, en frestur til að skila inn bindandi tilboðum rennur út á fimmtudag. Fjórir aðilar fengu möguleika á að skila inn bindandi tilboði. Það var hópur sem Óskar Magnússon leiðir, Vilhjálmur Bjarnason leiðir annan hóp sem kallar sig Almenningshlutafélag um Árvakur, þriðji aðilinn er ástralski fjárfestirinn Steve Cosser og í fjórða lagi eru það Árni Hauksson og Hallbjörn Karlsson, sem eitt sinn ráku Húsasmiðjuna.

Óskar Magnússon sagði í samtali við fréttastofu í morgun að hans hópur myndi líklegast skila inn tilboði en það gæti þó breyst. Verið væri að fara yfir gögn málsins. Vilhjálmur Bjarnason sagðist eiga von á að tilboð yrði lagt fram. Þá segir Guðmundur Oddsson, lögmaður Cossers, að hann myndi leggja tilboð fram. Hallbjörn Karlsson vildi ekkert tjá sig um málið þegar leitað var eftir viðbrögðum frá honum.