Ók fullur á ljósastaur á Vallarheiði

Mikill erill var hjá lögreglunni á höfuðborgarsvæðinu í ölvunar- og hávaðaútköllum. Sex fengu að gista fangageymslur vegna ölvunar. Þá voru sex teknir fyrir ölvun við akstur.

Einn var tekinn ölvaður við akstur í Reykjanesbæ. Sá kom upp um sig þegar hann ók á ljósastaur á Vallarheiði, gamla varnarsvæðinu. Einn ökumaður var tekinn grunaður um ölvun við akstur á Reykjanesbrautinni í nótt.  Hann var færður á lögreglustöðina við Hringbraut þar sem hann var sviptur ökuréttindum til bráðabirgða. Þrír ökumenn voru teknir fyrir of hraðan akstur á Reykjanesbrautinni í nótt.  Þeir mældust á 122, 119 og 125 km/klst. þar sem hámarkshraðinn er 90 km/klst.Að öðru leyti var nóttin róleg suður með sjó.

Á Akureyri fór nóttin vel fram og fáir á ferli í bænum. Einn gisti fangageymslur en hann var sendur frá Dalvík þar sem hann fór tjaldavillt, ofurölvi.

Á Dalvík fara fram Fiskidagar og er bærinn kjaftfullur að sögn lögreglu. Þegar best lét var röðin út úr bænum um tveggja kílómetra löng og um klukkutíma bið að komast inn í bæinn.

Á Selfossi var einn tekinn fyrir ölvun við akstur.

Rólegt var í öðrum umdæmum.