Hagkaup: Aldrei neinn þurft að greiða 1660 krónur fyrir salat

„Það er enginn sem hefur þurft að greiða 1660 krónur fyrir iceberg salat í Hagkaupum," segir Gunnar Ingi Sigurðsson, framkvæmdastjóri verslunarinnar.

Hann gerir alvarlegar athugasemdir við verðkönnun ASÍ, þar sem sagt var að kílóverð Hagkaupa á jöklasalati væri tæpum 800 prósentum hærra en til dæmis í Bónus.

Um sé að ræða mannleg mistök við hillumerkingu, en raunverulegt verð til viðskiptavina á viðkomandi vöru er 449 krónur.

„Auðvitað getur komið fyrir að hillumerkingar séu ekki réttar, verðbreytingar eru nú það örar í dag. Það skiptir mestu hvað viðskiptavinurinn greiðir, og það sést bara á strimlinum," segir Gunnar, sem gagnrýnir ASÍ fyrir að hafa ekki látið skanna strikamerkið til að fullvissa sig um hvert raunverulegt verð vörunnar væri.

Þá segir Gunnar einnig rangt að Hagkaup hafi oftast verið með hæsta verðið og segir ASÍ hafa talið vitlaust.

„Að fá svona á sig í fyrirsögnum er náttúrulega hræðilegt. Við viljum ekkert nema gott samstarf, en rétt þarf náttúrulega að vera rétt," segir Gunnar, sem er þreyttur á vinnubrögðum ASÍ við verðkannanir.