Skilanefnd skellir skuldinni á starfsmenn sína

„Lárus Finnbogason var ekkert inni í þessu máli," segir Páll Benediktsson, upplýsingafulltrúi skilanefndar Landsbankans, spurður út í fyrirhugaða sölu á stofnfjárbréfum í Byr til Reykjavík Invest en Lárus Finnbogason formaður skilanefndarinnar er endurskoðandi félagsins. Salan á bréfunum var tilkynnt á stjórnarfundi hjá Byr síðastliðinn föstudag en skilanefndin ákvað á fundi í gær að ekkert yrði af henni. Lárus vék af þeim fundi vegna tengsla sinna við Reykjavík Invest að sögn Páls. Hann segir að starfsmenn nefndarinnar hafi gengið of langt.

Aðspurður hvenær fundurinn var haldinn svarar Páll því að hann hafi verið haldinn síðdegis. Spurður hvenær síðdegis þá vildi Páll ekki svara því. Þegar blaðamaður spurði hvort fundurinn hafi átt sér stað fyrir fréttir Stöðvar 2 svarar Páll: „Ég staðfesti ekki hvenær þessi fundur var haldin." Fréttastofa hefur heimildir fyrir því að í það minnsta tveir skilanefndarmenn hafi ekki haft hugmynd um söluna fyrr en þeir sáu frétt Stöðvar 2 í gærkvöldi.

Þrátt fyrir ákvörðun skilanefndarinnar í gær þá barst Byr tilkynning á föstudag um að félagið Reykjavík Invest ættu sannarlega 2,6 prósent stofnfjárhlut í Byr og hefðu þar af leiðandi kosningarétt á aðalfundi bankans sem verður haldin á morgun.

Þegar Páll er spurður hverju þetta sæti svarar hann því til að starfsmenn nefndarinnar hafi tekið ákvörðun um viðskiptin og að skilanefndin hefði átt eftir að fjalla um þau og veita samþykki sitt. „Það voru ákveðin mistök sem áttu sér stað. Þetta fór of langt."

Reykjavík Invest var engu að síður með atkvæðarétt þangað til í morgun þegar Byr breytti lista sínum yfir stofnfjáreigendur eftir að skilanefndin hafði óskað eftir því.

Blaðamaður spurði þá Pál hvort skilanefndin hugðist ekki taka ábyrgð á þessum mistökum svarar Páll: „Skilanefndin axlar ábyrgð með því að hafna þessu. Hún viðurkennir þar af leiðandi að þarna hafi ekki verið nægilega vel að verki staðið."