Boldsen aftur til Danmerkur

Danski handknattleiksmaðurinn mun yfirgefa herbúðir Barcelona í lok leiktíðarinnar og ganga þá í raðir danska B-deildarfélagsins AG Håndbold.

Þetta var tilkynnt í dag. Gera má reyndar ráð fyrir því að AG verði orðið úrvalsdeildarfélag á næsta tímabili en liðið er á toppi B-deildarinnar með fullt hús stiga.

Ólafur Stefánsson samdi við AG á sínum tíma en ákvað svo að ganga til liðs við Rhein-Neckar Löwen í Þýskalandi þess í stað.

Boldsen er 31 árs og skrifaði undir þriggja ára samning við félagið.

„Barcelona bauð mér að framlengja samninginn og okkur líður mjög vel hér," sagði Boldsen við danska fjölmiðla í dag. „En fjölskyldan vill gjarnan fara aftur heim - og það vil ég eiginlega líka."