Deilur í Borgarahreyfingunni: Þór segir fundinn í gær gagnslausan

Þór Saari, þingmaður Borgarahreyfingarinnar, segir félagafund hreyfingarinnar vegna klofnings þingflokksins í gær gagnslausan bæði málefninu og hreyfingunni. Þetta kemur fram bæði á heimasíðu Þórs og í athugasemdum við fundarboðið á heimasíðu Borgarahreyfingarinnar.

Þá segir Þór að allir þingmenn hreyfingarinnar fyrir utan Þráin Bertelsson hafi óskað eftir að félagafundinum yrði frestað um viku þar sem vitað væri að þau gætu ekki mætt þrátt fyrir að vilja koma.

Samkvæmt tölvupóstum sem gengu á milli stjórnarmanna á miðvikudagskvöld hafi verið fallist á það. Hins vegar hafi einhver skipt um skoðun í gærmorgun og hafi þá hafist upp átök innan stjórnar hreyfingarinnar hvort halda ætti fundinn eður ei.

„Hann var svo greinilega haldinn og hefur vonandi verið einhverjum til gagns, en málefninu og hreyfingunni gagnaðist hann ekki," segir Þór.

Sigurður Hr. Sigurðsson, stjórnarmaður hreyfingarinnar, segir í athugasemd við fundarboðið að það sé rétt hjá Þór að vel hafi verið tekið í að fresta félagafundinum. Hins vegar hafi staðan breyst í gærmorgun eftir umfjöllun Fréttablaðsins, en þar sagði Þráinn Bertelsson frá því að hann hefði hætt samskiptum við flokssystkini sín á þingi. Því hafi verið hætt við að fresta fundinum.

„Tilkynning um það var send öllum þingmönnunum í [gær]morgun og hefði það verið hægðarleikur fyrir þau flest að mæta ef þau hefðu kært sig um. Fundurinn var ágætlega sóttur og mjög gagnlegur hvað svo sem fjarstöddum kann að finnast," segir jafnframt í athugasemd Sigurðar.

Umræður um málið má sjá á heimasíðu Borgarahreyfingarinnar hér.