Lækkandi olíuverð er 5 milljarða kr. búbót fyrir útgerðina

Lækkandi heimsmarkaðsverð á olíu eru góðar fréttir fyrir útgerðina hérlendis. Áætla má að ef olíuverð helst út árið á svipuðum slóðum og það er í dag sé um 5 milljarða kr. búbót að ræða fyrir útgerðina.

Friðrik Arngrímsson framkvæmdastjóri LÍÚ segir að verðþróunin á olíumörkuðunum undanfarnar vikur og mánuði sé vissulega gleðiefni fyrir útgerðina. "Þetta léttir hjá okkur róðurinn," segir Friðrik.

Þá má einnig nefna að þegar olíuverðið náði hámarki síðasta sumar lögðust veiðar á djúpslóð að mestu niður, eins og t.d. kolmunnaveiðar, sökum þess að olíukostnaðurinn var kominn í um 40% af úthaldinu. Nú geta skip sótt að nýju á þessi mið sem kemur sér vel meðan óvissa ríkir um hvort loðnuveiðar verða leyfðar að nýju eða ekki.

Sveinn Hjörtur Hjartarsson hagfræðingur LÍÚ hefur reiknað út fyrir Fréttastofuna hve mikil búbót lækkandi olíuverð er fyrir útgerðina. Sveinn segir að meðalverðið á gasolíu hafi verið tæplega 895 dollarar á tonnið í fyrra. Í dag er þetta verð 426,5 dollarar á tonnið.

Reikna má með að olíukostnaður fiskiskipaflotans í fyrra hafi numið 17,6 milljörðum kr. Miðað við verðið á oliunni í dag má áætla að þessi kostnaður í ár nemi 12,9 milljarðar kr. sem er tæplega 5 milljarða kr. viðsnúningur eða 26,7% lækkun á þessum kostnaðarlið.

Fram kemur í útreikningum Sveins Hjartar að áætla má að olíukostnaðurinn verði um 13,5% af tekjum útgerðarinnar í ár. Til samanburðar má nefna að þegar olíuverðið náði hámarki s.l. sumar var áætlað að kostnaðurinn yrði yfir 20% af tekjunum.

"Hér er því um töluverð umskipti að ræða ef þessar áætlanir ganga eftir," segir Sveinn Hjörtur.