Sjö nýjar minjagripaverslanir í miðbænum

Sjö nýjar minjagripaverslanir hafa opnað í miðborginni frá því í maí og eru þær nú sextán. Ef bókabúðirnar eru taldar með, sem breytast að einhverju leyti í minjagripaverslanir á sumrin, eru þær nítján. Þetta segir Helgi Hrannarr Jónsson, framkvæmdastjóri Global Refund, sem annast umsýslu Tax Free á Íslandi.

„Sumt af þessu er eðlileg aukning því það eru alltaf einhverjir sem opna fyrir hvert ferðamannatímabil," segir Helgi. Sérstaklega hafa margar opnað á Skólavörðustígnum og eru nú fjórar neðst á Skólavörðustígnum.

„Það sem er jákvætt við þetta er að það eru nýir aðilar að koma inn á markaðinn," segir Helgi en segir erfitt að skilgreina minjagripaverslanirnar þar sem margar séu blandaðar verslanir.

En hvað veldur? „Þetta má rekja til tveggja þátta. Það er annars vegar lágt gengi krónunnar og ferðamenn eru því að eyða miklu meiru. Síðan virðist fólk vera að leita að nýjum tækifærum í atvinnurekstri," segir Helgi.

Global Refund hefur tekið rækilega eftir aukningunni, að sögn Helga, og er meðaltalsávísun frá ferðamönnum, sem leita eftir Tax Free, nú töluvert hærri en hefur verið. Ferðamenn eyði meiru þótt þeir séu ekki fleiri en undanfarin ár.

Bjarni Jónsson, annar eigenda Nordic Store ehf., minjagripabúðar sem opnuð var í maí á Skólavörðustíg, segir reksturinn hafa gengið vel. Hann segir Nordic Store öðruvísi minjagripabúð en hinar.

„Við erum öðruvísi búð þannig að við erum ekki í samkeppni nema á afmörkuðum sviðum. Við seljum ekki þessa litlu minjagripi eins og margar búðir heldur erum við með fjölbreytt úrval af íslenskri hönnun, skartgripum, snyrtivörum, tónlist, lopavörum, sælgæti og bókum. Allt íslenskar vörur," segir Bjarni.

Hilmar Már Aðalsteinsson, verslunarstjóri Rammagerðarinnar, sem stofnuð var árið 1946, segir fyrirtækið ekki finna fyrir aukinni samkeppni, þrátt fyrir gríðarlega fjölgun minjagripaverslana.

„Við höldum okkar ótrúlega vel og höfum opnað þrjár nýjar búðir, á Skólavörðustíg, á Akureyri og Egilsstöðum. Þetta er auðveldara fyrir okkur þar sem við höfum ákveðið samkeppnisforskot vegna aðfanga," segir Hilmar. Hann segir að í seinni hluta ágúst hrynji sala niður og hann efast um að nýju verslanirnar haldi út veturinn.