Afskrifa strax 75 milljarða kr. af kröfum á fjármálafyrirtæki

Nú liggur ljóst fyrir að ríkissjóður mun afskrifa strax 75 milljarða kr. af þeim kröfum sem Seðlabankinn á á hendur fjármálafyrirtækja í landinu.

Í tilkynningu frá fjármálráðuneytinu segir að á grundvelli heimildar í fjáraukalögum fyrir árið 2008 sem samþykkt var á Alþingi 22. desember sl. var í dag gert samkomulag um að Seðlabanki Íslands framselji ríkissjóði kröfur á fjármálafyrirtæki að fjárhæð 345 milljarðar króna.

Gegn yfirtöku krafnanna greiðir ríkissjóður 270 milljarða króna með verðtryggðu skuldabréfi til 5 ára, með 2,5 prósent ársvöxtum.

Eins og fram hefur komið í fréttum er fyrrgreindir 345 milljarðar kr., sú upphæð sem Seðlabankinn lánaði fjármálafyrirtækjum, að stærstum hluta gömlu bönkunum þremur, áður en bankakerfið hrundi s.l. haust.

Veðin sem eru fyrir þessum lánum, þ.e. skuldabréf í gömlu bönkunum þremur eru talin nær verðlaus meðal erlendra kröfuhafa bankanna. Á uppboðum á síðasta ári hjá þeim félögum/sjóðum sem gáfu út skuldatryggingar á sambærileg bréf fyrir hrun bankanna var talið að mest fengist fyrir bréf í Kaupþingi eða 6,6% af nafnverði.

Í Glitni var þetta hlutfall talið vera rúm 3% og hvað Landsbankann varðar aðeins 1,25%.