Skólar geta starfað eðlilega þrátt fyrir svínaflensuna

Allt skólastarf í landinu getur hafist með eðlilegum hætti næstu daga og vikur þrátt fyrir heimsfaraldur inflúensunnar H1N1, eða svokallaðrar svínaflensu. Þetta kemur fram í fréttatilkynningu frá Landlækni. Þar segir að talsvert hafi verið um fyrirspurnir frá skólastjórnendum, foreldrafélögum og fleirum um möguleg áhrif inflúensufaraldursins á starfsemi skóla á komandi haustönn. Nú hafa alls 112 greinst á Íslandi með svínaflensuna. Málið var rætt í morgun á fundi samráðsnefndar sóttvarnalæknis, ríkislögreglustjóra og fulltrúa ráðuneyta.

Sóttvarnarlæknir áréttar að inflúensufaraldurinn er tiltölulega vægur og skapar engar forsendur fyrir skorðum við skólahaldi. Skólastarf eigi því að geta hafist með eðlilegum hætti. Þá sé unnið að viðbragðsáætlun vegna inflúensufaraldurs fyrir skóla landsins í samvinnu menntamálaráðuneytis og skólastjórnenda. Gert er ráð fyrir að sú áætlun verði tilbúin fyrir 1. september 2009.